أنا المصرى الغلبان
يا مصر يا أم الدنيا يا أغلى الاوطان
شعبك حر أصيل مش خايف مش جبان
نيلك اللى كان بيروينا أصبح مر ظمئان
سماكى مبقتش صافيه ونجمك فيها حيران
شتاكى اللى كان بيدفى أصبحت من بردان
وصيف وهوا اسكندريه أصبحت من قرفان
ابتسامتى مدفونه عشان من جوه زعلان
أنا المصرى الغلبان
أول فرصه شغل فى أول دوله بطير ليها طيران
بقول أنا مصرى بره بلدى وفى وشى شويه خجلان
طقه وطقتين وتلاته وبرضو لسه جعان
الاكل فيكى ملوش طعم وأنا منه مش شبعان
مع انهم شويه فول وفلافل وحبه بتنجان
ميتك بقى لونها أصفر وعايشه فيها الديدان
اللى شايفينه بصحته من بره أكيد من جوه مرضان
المرض بالهيله فيكى أخرنا بقى السرطان
رميتى ناسك ع الرصيف نايمه من غير غطيان
النسر اللى فى علمك قرب يطير من الوقفه أصبح ملان
أنا المصرى الغلبان
تعليم تصنيف تالت ما هو تعليم بالمجان
مخدرات زى الرز بقيت ليها مدمن ادمان
كلام تهييس فى أغانيكى وضاع لقب فنان
رجاله فيكى لبست طرح وبقت شبه النسوان
أنا المصرى الغلبان
وفى يوم 25 قومتى بثوره ضد الطغيان
عروس بعد الثوره بس من غير فستان
جهل ناسك يا بلدى وصلنا لحكم الاخوان
طول عمرهم تحت الارض زى الفيران والجرزان
بينادى اليهود تعيش فيكى واحد اسمه العريان
وأكتر تجاره ربحانه فى عهدهم هى تجاره الاكفان
بيقولوا تاريخهم 80 سنه وحافظ زى الحيوان
وأول مشكله حقيقيه بيكون منها هربان
كان حلمه يوصل للسلطه وبعد كده مش فهمان
بيدافعوا عن غزه قبلك ونسوا المصرى الانسان
أنا المصرى الغلبان
أسعد لحظات حياتى لما بشوف الاهلى فى اليابان
بس راح بورسعيد ورجع منها حزنان
حكايه اولتراس وشباب جدعان
ساعه الثوره كان أكبر حامى للميدان
منسيش قضيته ووقف موقف الشجعان
أنا المصرى الغلبان
أتوبيس كان فيه أرواح بريئه حافظه القران
ماتت فى لحظه اهمال وهى بتعدى المزلقان
بيقولوا الطفل المصرى هو أذكى انسان
مع انه طفل عادى بيتفرج على لينا وعدنان
أنا المصرى الغلبان
فاكر حروبك وانجازاتك ما أنا برضو ليها فرحان
ودول مستنيه لينا غلطه عامله زى الشوكه فى الحلقان
أبويا تعب من الشغل ما هو طول النهار شقيان
كترت مصاريفى أنا واخواتى والراجل بقى تعبان
حرم نفسه من متعه الدنيا وبيوفر تمن القمصان
أنا المصرى الغلبان
يا مصر ياللى وصفوكى بالامن والامان
نعمه بيتمناها غيرى كتير وأنا عليكى ندمان
قلبى بيدق باسمك دق العاشق الولهان
يارب احفظها من كل سوء يا كريم يا رحمن
يارب مالنا غيرك يا حنان يا منان
أنا المصرى الغلبان
عمورة بقى شاعر و انا ماعنديش خبر و لا ايه ؟ :D
ردحذفحلوة عجبتني